కోతి మరియు మొసలి
ఒక విశాలమైన నది ఒడ్డున ఒక నేరేడు చెట్టు ఉండేది. ఆ చెట్టు మీద ఒక కోతి నివసించేది. చెట్టు నిండా తియ్యటి ఊదా రంగు పండ్లు ఉండేవి.
ఒక రోజు ఒక మొసలి ఈదుకుంటూ ఆ చెట్టు దగ్గరికి వచ్చింది. కోతి దానికి కొన్ని నేరేడు పండ్లు విసిరింది. “ఆహా, ఎంత రుచిగా ఉన్నాయి!” అంది మొసలి. కొద్ది రోజుల్లోనే అవి మంచి స్నేహితులు అయ్యాయి.
ప్రతి రోజూ మొసలి కోతిని చూడటానికి వచ్చేది. ప్రతి రోజూ తన భార్య కోసం కొన్ని నేరేడు పండ్లు ఇంటికి తీసుకెళ్ళేది.
కానీ మొసలి భార్యకు అత్యాశ ఎక్కువ. “ఈ పండ్లే ఇంత తియ్యగా ఉంటే, వీటిని రోజూ తినే కోతి గుండె ఇంకెంత తియ్యగా ఉంటుందో! నాకు ఆ కోతి గుండె తెచ్చి పెట్టు!” అంది.
తన స్నేహితుడికి హాని చేయడం మొసలికి ఇష్టం లేదు. అయినా భార్య మాటకు ఒప్పుకుంది. “మా ఇంటికి భోజనానికి రా, మిత్రమా,” అని కోతిని పిలిచింది. “నా వీపు మీద కూర్చో. నిన్ను నది దాటిస్తాను.”
నది మధ్యకు వచ్చాక మొసలి అంది, “నన్ను క్షమించు, మిత్రమా. నా భార్య నీ గుండె తినాలనుకుంటోంది.”
కోతి చటుక్కున ఆలోచించింది. “అయ్యో! నా గుండెను నేను నేరేడు చెట్టు మీదే దాచిపెడతాను. నన్ను వెనక్కి తీసుకెళ్ళు, వెళ్ళి తెచ్చిస్తాను.”
తెలివితక్కువ మొసలి వెనక్కి ఈదుకుంటూ వెళ్ళింది. కోతి ఒక్క గెంతులో చెట్టు ఎక్కేసింది. హమ్మయ్య, ఇప్పుడు భద్రంగా ఉంది! “గుండె ఎక్కడైనా చెట్టు మీద ఉంటుందా?” అని కోతి నవ్వింది. “నిజమైన స్నేహితుడు ఎప్పుడూ స్నేహితుణ్ణి మోసం చేయడు. ఇక సెలవు!”
